przeproszanie

kupił żech korale
babie w przeprosinach
co by zaś na feście
ze mną zatanczyła

bo jo sie ostatnio
kajś pieronem nachloł
jak żech przyszoł do dom
troszka sie zgorszyła

a ona mi pado
w życi mom korale
wola kej byś nie pił
tak wiela cymbale

lepiej co byś dzieciom
kupił po bombonie
a nie piwsko żłepoł
w szynku ty pieronie

wtedy żech sie wnerwił
z szranku wyciągł halba
jak to obejrzała
to dostała szajba

wziena nudelkula
pizła mnie bez dekiel
tera musza leżeć
tydzień w lazarecie

zaś jej było gańba
żol jej sie zrobiło
i na przeprosiny
przyniesła mnie piwo

tak już lot pietnoście
razem se żyjemy
roz sie powadzimy
a roz se przajemy

piotr skała szkudlarek

skala